ئەمڕۆ شەممە ١٤/١٢/٢٠٢٤ وەفدێکی یەکێتی لاوانی شۆسیالست کە پێکهاتبوون لە سارینا ئەبراهمیان سکرتێری یەکێتیەکە و سەیف عقیل جێگری سەرۆکی یەکێتیەکە، سەردانی بارەگای ڕێکخراویان کرد و لەلایەن هێرش نامق سکرتێری ڕێکخراو و ئەندامانی سکرتاریەت پێشوازی گەرمیان لێکرا.
پاشان کۆبوونەوەی هەردوولا بەڕێوەچوو بۆ تاوتوێکردنی بارودۆخی لاوان و بارودۆخی ناچەکە و کاریگەری لاوان لەسەر کۆمەڵگا، کەهەردوولا هاوڕابوون لەسەر بەردەوام بوون لە خزمەتکردنی لاوان و دۆزینەوەی میکانیزمی نوێ بۆ خزمەتی لاوان بەپێی پێویستی سەردەم.
پاشان تەوەری سەرەکی سەردانەکە گفتووگۆی دەربارەکرا، سەبارەت بە ئەنجامدانی کۆنگرەی یەکێتیەکە لەساڵی داهاتوو لەشاری سلێمانی و چۆنیەتی دەستکردن بەئامادەسازی بۆ کۆنگرەی ساڵی داهاتوو.
هەرلەدرێژەی گفتوگۆکاندا وەفدی میوان دڵخۆشی خۆیان دەربڕی بە پێشکەوتنی کوردستان و سەقامگیری دۆخی ئەمنی، کە ئەمانە هەموو زەمینەسازی دەکەن بۆ ئەوەی ڕێکخراوە جیهانییەکان سەردانی کوردستان بکەن و پڕۆژەکانیان بخەنە ڕوو بۆ خزمەتی دۆزی لاوان.
لەکۆتاییدا قەڵغانی ڕێزلێنان پێشکەش بەوەفدی میوانکراو کۆتایی بەکۆبوونەوەکە هات، بڕیاریش وایە لە ماوەی سەردانەکەیان چەندان شوێنی تر بەسەربکەنەوە بەهاوکاری ڕێکخراوی ئازادیی لاوانی کوردستان.
